MINISTRY OF HEALTH

တောင်ကြီး၊ ၂၀၂၀ ပြည့်နှစ်၊ နို၀င်ဘာလ (၃၀) ရက်

     ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး၏ လမ်းညွှန်မှု၊ ရှမ်းပြည်နယ် အစိုးရအဖွဲ့နှင့် ရှမ်းပြည်နယ် (တောင်ပိုင်း) ပြည်သူ့ကျန်းမာရေးနှင့်ကုသရေးဦးစီးဌာနတို့၏ ဦးဆောင်မှုဖြင့် ရှမ်းပြည်နယ် (တောင်ပိုင်း) အတွင်း COVID-19 ရောဂါ ကာကွယ်ခြင်းဆိုင်ရာ ကျန်းမာရေးအသိပညာမြှင့်တင်ရေးနှင့် ပြုမူပြောင်းလဲရေးဆက်သွယ်ပညာပေး လူထုလှုပ်ရှားမှုစီမံချက် (Mask and Face Shield Campaign) ကို အရှိန်အဟုန်မြှင့် ဆောင်ရွက်လျက်ရှိပါသည်။

     ဈေးများ၊ လမ်းများနှင့်လူစည်ကားရာနေရာများ၊ COVID-19 ရောဂါ ကူးစက်နိုင်ခြေမြင့်မားသော နေရာများတွင် ပြည်သူများအား ပါးစပ်နှင့်နှာခေါင်းစည်း (Mask) နှင့် မျက်နှာအကာ (Face Shield) များ ဖြန့်ဝေပြီး စနစ်တကျတပ်ဆင်စေခြင်း၊ လက်ကိုင်အသံချဲ့စက်များဖြင့် ကျန်းမာရေးအသိပညာပေးခြင်း၊ ပြည်သူများလိုက်နာရမည့် COVID-19 ရောဂါကာကွယ်ခြင်းဆိုင်ရာ အမူအကျင့်ကောင်းများကို အသိပညာပေးခြင်း၊ လက်ကမ်းစာစောင်များဖြန့်ဝေခြင်းတို့ကို အရှိန်အဟုန်မြှင့် ဆောင်ရွက်လျက်ရှိပါသည်။

     နိုဝင်ဘာလ (၃၀) ရက်နေ့တွင် ရှမ်းပြည်နယ် (တောင်ပိုင်း) ပြည်သူ့ကျန်းမာရေးနှင့်ကုသရေးဦးစီးဌာနမှူးသည် တောင်ကြီးမြို့နယ် ပြည်သူ့ကျန်းမာရေးဦးစီးဌာနမှ အခြေခံကျန်းမာရေးပညာရှင်ဝန်ထမ်းများနှင့်အတူ တောင်ကြီးမြို့ပေါ်ရှိ အ.ထ.က (၅) ပျံကျဈေး၊ အဝေရာကွင်း ပျံကျဈေး၊ စိန်ပန်း/ရွှေတောင်ရပ်ကွက် ပျံကျဈေးများသို့ သွားရောက်ပြီး ဈေးသည်နှင့် ဈေးဝယ်များအား Mask များ အခမဲ့ဖြန့်ဝေပေးခဲ့သည်အပြင် Mask များ စနစ်တကျ တပ်ဆင်ကြရန်နှင့် ကျန်းမာရေးနှင့်အားကစားဝန်ကြီးဌာန၏ လမ်းညွှန်ချက်များကို လိုက်နာကြရန် လက်ကိုင်အသံချဲ့စက်များဖြင့် ပညာပေးဆော်ဩခဲ့ပါသည်။

     ထို့အပြင် မင်္ဂလာဦးရပ်ကွက်ရှိ မြို့ဦးဘုန်းတော်ကြီးကျောင်းနှင့် ရှမ်းရိုးမဘိုးဘွားရိပ်သာများသို့လည်း သွားရောက်ပြီး Mask နှင့် Face Shield များ လှူဒါန်းခဲ့ပါသည်။