MINISTRY OF HEALTH

ကျိုင်းတုံ၊ ၂၀၂၀ ပြည့်နှစ်၊ နိုဝင်ဘာလ (၁၈) ရက်

     ရှမ်းပြည်နယ် (အရှေ့ပိုင်း)၊ ပြည်နယ်ဒုတိယအုပ်ချုပ်ရေးမှူး ဦးရဲနိုင်၊ ပြည်နယ် ပြည်သူ့ကျန်းမာရေးဦးစီးဌာနမှ ဒုတိယပြည်နယ်ပြည်သူ့ကျန်းမာရေးဦးစီးဌာနမှူး ဒေါက်တာကျော်ကျော်လင်းနှင့် ဒေါက်တာဝင်းလဲ့ထွဋ်တို့ ဦးဆောင်ပြီး ကျိုင်းတုံမြို့နယ် ပြည်သူ့ကျန်းမာရေးဦးစီးဌာန၊ အထွေထွေအုပ်ချုပ်ရေးဉီးစီးဌာန၊ မြို့နယ်စည်ပင်သာယာရေးအဖွဲ့၊ မီးသတ်ဦးစီးဌာန၊ မြန်မာနိုင်ငံကြက်ခြေနီအသင်း အစရှိသော ဌာနဆိုင်ရာ ပူးပေါင်းအဖွဲ့သည် (၁၈-၁၁-၂၀၂၀) ရက်နေ့၊ နံနက်ပိုင်းတွင် ကျိုင်းတုံမြို့မဈေး၌ COVID-19 ရောဂါ ကာကွယ်ခြင်းဆိုင်ရာ ကျန်းမာရေးအသိပညာမြှင့်တင်ရေးနှင့် ပြုမူပြောင်းလဲဆက်သွယ်ပညာပေး လူထုလှုပ်ရှားမှုများ (Mask & Face Shield Campaign) ကို ပူးပေါင်းဆောင်ရွက်ခဲ့ကြသည်။

     အဆိုပါလှုပ်ရှားမှုကို ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး၏ လမ်းညွှန်မှုဖြင့် COVID-19 ရောဂါ ဒေသတွင်းကူးစက်မှု လျော့နည်းစေရေးနှင့် ပပျောက်စေရေးအတွက် ပြည်သူလူထုက ရောဂါကာကွယ်ရေးနည်းလမ်းများကို ပိုမိုအလေးပေး ဂရုစိုက်လာစေပြီး အလေ့အကျင့်မှ အလေ့အထသို့ ရောက်ရှိစေရန် ရည်ရွယ်၍ လူစည်ကားရာနေရာဖြစ်သော ကျိုင်းတုံမြို့မဈေးတွင် ဆောင်ရွက်ခဲ့ခြင်း ဖြစ်ပါသည်။

     ကျိုင်းတုံမြို့မဈေးအတွင်းသို့ ဝင်ရောက်မည့် မည်သူမဆို ပါးစပ်နှင့်နှာခေါင်းစည်း တပ်ဆင်ခြင်း၊ ဈေးအတွင်း ဈေးရောင်း/ဈေးဝယ်များအား ပါးစပ်နှင့်နှာခေါင်းစည်း စနစ်တကျတပ်ဆင်စေခြင်း၊ လက်ကိုင်စပီကာများဖြင့် COVID-19 ရောဂါ ကာကွယ်ရေး နည်းလမ်းများကို လှည့်လည်အသိပေးပြောကြားခြင်း၊ COVID-19 ရောဂါကာကွယ်ရေး လိုက်နာဆောင်ရွက်ရမည့် အချက်များပါဝင်သော လက်ကမ်းစာစောင်များ ဖြန့်ဝေခြင်း၊ ပါးစပ်နှင့်နှာခေါင်းစည်း (၅,၀၀၀) ခုနှင့် မျက်နှာအကာ (၅,၀၀၀) ခုတို့ကို အခမဲ့ပေးဝေခြင်း စသည်တို့ကို လူထုလှုပ်ရှားမှုအသွင်ဖြင့် ဆောင်ရွက်ခဲ့ကြပြီး ရောဂါကူးစက်နိုင်မှုမြင့်မားနိုင်သော အခြားနေရာများတွင်လည်း ဆက်လက်၍ အရှိန်အဟုန်မြှင့်တင် ဆောင်ရွက်သွားမည်ဖြစ်ပါသည်။