MINISTRY OF HEALTH

ရန်ကုန်၊ (၂၀၁၈) ခုနှစ်၊ အောက်တိုဘာလ (၂၁) ရက်နေ့

     အင်ဒိုနီးရှားနိုင်ငံဂျာကာတာမြို့တွင် အောက်တိုဘာ (၆)ရက်မှ (၁၃)ရက်နေ့အထိ ကျင်းပပြုလုပ်သည့် (၃)ကြိမ်မြောက်အာရှ မသန်စွမ်းအားကစားပြိုင်ပွဲတွင်အောင်မြင်မှုရရှိသော နိုင်ငံ့ဂုဏ်ဆောင်ခဲ့ကြသည့် မြန်မာ့လက်ရွေးစင် မသန်စွမ်းအားကစားသမားများနှင့် နည်းပြများ အား ဂုဏ်ပြုဆုချီးမြှင့် ခြင်းအခမ်းအနားကို ယမန်နေ့ည(၆)နာရီက ရန်ကုန်မြို့ အနောက်ရွှေဂုံတိုင်လမ်းရှိ M3 Food Center ၌ ကျင်းပရာ မြန်မာနိုင်ငံ အိုလံပစ် ကော်မတီ ဒုတိယ ဥက္ကဋ္ဌ ကျန်းမာရေးနှင့် အားကစားဝန်ကြီးဌာန ဒုတိယဝန်ကြီးဒေါက်တာမြလေးစိန် ၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့်အားကစားနှင့်ကာယပညာ ဦးစီးဌာနမှ တာဝန်ရှိပုဂ္ဂိုလ်များ၊ မြန်မာနိုင်ငံမသန်စွမ်းသူများအားကစားအဖွဲ့ချုပ်ဥက္ကဋ္ဌ ဗိုလ်မှူးချုပ်ဝင်းလွင်၊ ဒုတိယဥက္ကဋ္ဌ ဦးမျိုးမြင့်နှင့် အမှုဆောင်များ၊ အောင်ပွဲရမြန်မာ့လက်ရွေးစင် မသန်စွမ်းအားကစားသမားများ၊ အလှူရှင်များ၊ ဖိတ်ကြားထားသောဧည့်သည်တော်များတက် ရောက်ကြသည်။

     ရှေးဦးစွာ မြန်မာနိုင်ငံအိုလံပစ်ကော်မတီဒုတိယ ဥက္ကဋ္ဌ ကျန်းမာရေးနှင့်အားကစား ဝန်ကြီးဌာန ဒုတိယဝန်ကြီးဒေါက်တာမြလေးစိန် က အောင်ပွဲရအားကစားသမားများအား ဂုဏ်ပြုအမှာစကားပြောကြား၍လည်းကောင်း၊ မြန်မာနိုင်ငံမသန်စွမ်းအားကစားအဖွဲ့ချုပ်ဥက္ကဋ္ဌ ဗိုလ်မှူးချုပ်ဝင်းလွင် က ဂုဏ်ပြုအမှာစကားပြောကြားပြီး မြန်မာနိုင်ငံမသန်စွမ်းသူများ အားကစား အဖွဲ့ အဖွဲ့ခေါင်းဆောင် ဒုတိယဥက္ကဋ္ဌ ဦးမျိုးမြင့် က ပြိုင်ပွဲဝင်ရောက်ယှဉ်ပြိုင်ခဲ့မှု အခြေအနေ များနှင့်ပတ်သက်၍ ရှင်းလင်းတင်ပြခဲ့သည်။

     ဆက်လက်၍ မြန်မာနိုင်ငံအိုလံပစ်ကော်မတီဒုတိယ ဥက္ကဋ္ဌ ကျန်းမာရေးနှင့်အားကစား ဝန်ကြီးဌာန ဒုတိယဝန်ကြီးဒေါက်တာမြလေးစိန် က မီတာ(၅၀)နောက်ပြန်ကူးပြိုင်ပွဲတွင် ငွေတံဆိပ် ဆုရ ကျော်ထူးနှင့် မီတာ(၁၀ဝ)နောက်ပြန်ကူးငွေတံဆိပ်ဆုရ အောင်မြင့်မြတ်၊ မျက်မမြင်စစ်တုရင် တစ်ဦးချင်းပြိုင်ပွဲတွင် ငွေတံဆိပ်ဆုရ ကောင်းစံနှင့် မျက်မမြင်စစ်တုရင်အသင်းလိုက်ပြိုင်ပွဲတွင် ငွေတံဆိပ်ဆုရ ကောင်းစံ၊ မျိုးဆန်းအောင်နှင့်သန်းဌေးတို့အား ငွေတံဆိပ်(၁)ခုလျှင်ငွေကျပ် သိန်း(၃၀)စီအား ပေးအပ်ချီးမြှင့်၍လည်းကောင်း၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင် က ရေကူးမီတာ(၅၀)အလွတ်ကူးပြိုင်ပွဲတွင် ကြေးတံဆိပ်ဆုရ အောင်မြင့်မြတ်နှင့် မီတာ(၁၀ဝ)ရင်ဘောင်တန်းကူးပြိုင်ပွဲတွင် ကြေးတံဆိပ်ဆုရ အောင်ငြိမ်းဦး တို့အား ဂုဏ်ပြုဆုငွေကျပ် (၂၀)သိန်း စီနှင့် နည်းပြဆရာများ အား တစ်ဦးလျင် ငွေကျပ်(၅)သိန်း နှုန်းဖြင့် နည်းပြ(၃)ဦးအတွက် ကျပ်(၁၅)သိန်း တို့အား အသီးသီးပေးအပ်ချီးမြှင့်ခဲ့သည်။

     ဆက်လက်၍ အောင်ပွဲရမြန်မာ့လက်ရွေးစင်မသန်စွမ်းအဖွဲ့နှင့်အာရှအဆင့် (၇)မှ အဆင့်(၅)သို့တက်လှမ်းနိုင်ခဲ့သော ထိုင်လျက်ဘော်လီဘောအသင်းတို့အတွက် အလှူရှင် အသီးသီးကဂုဏ်ပြုဆုငွေကျပ် (၁၃၂)သိန်းကိုပေးအပ်လှူဒါန်းရာ မြန်မာနိုင်ငံမသန်စွမ်းသူများ အားကစားအဖွဲ့ချုပ်ဥက္ကဋ္ဌ ဗိုလ်မှူးချုပ်ဝင်းလွင် ကလက်ခံရယူခဲ့ပြီး မြန်မာနိုင်ငံမသန်စွမ်းသူများ အားကစားအဖွဲ့မှ ဆုရရှိသူ တစ်ဦး က ကျေးဇူးတင်စကားပြောကြားကာ ဂုဏ်ပြုညစာစားပွဲဖြင့် တည်ခင်းဧည့်ခံခဲ့သည်။

     အဆိုပါဂုဏ်ပြုပွဲတွင်ငွေတံဆိပ်(၄)ခု၊ ကြေးတံဆိပ်(၂)ခုရရှိသော နိုင်ငံ့ဂုဏ်ဆောင် အားကစားသမားများနှင့်နည်းပြများအား ငွေတံဆိပ်(၁)ခုလျင်ကျပ်သိန်း(၃၀)၊ ကြေးတံဆိပ် တစ်ခုလျင်ကျပ်သိန်း(၂၀)၊ နည်းပြတစ်ဦးလျင်ကျပ်(၅)သိန်းစီဖြင့် ကျန်းမာရေးနှင့် အားကစား ဝန်ကြီးဌာနမှ ဂုဏ်ပြုချီးမြှင့်ငွေကျပ် (၁၇၅) သိန်းဖြစ်ကြောင်းသိရှိရသည်။