အသွားအလာကန့်သတ်ကာ သတ်မှတ်နေရာများ၌ စောင့်ကြပ်ကြည့်ရှုခြင်း (quarantine) လုပ်ငန်းများနှင့် စပ်လျဉ်း၍ ပြည်သူများထံအသိပေးပြောကြားခြင်း (9-4-2020)
နေပြည်တော်၊ (၂၀၂၀) ပြည့်နှစ်၊ ဧပြီလ (၉) ရက်နေ့
• ယခုအခါ မြန်မာနိုင်ငံတွင် COVID-19 ဓာတ်ခွဲအတည်ပြုလူနာ (၂၂) ဦးတွေ့ရှိခဲ့ပြီး၊ ၎င်းတို့အနက် (၃) ဦးသေဆုံးခဲ့ပါသည်။
• အဆိုပါ (၂၂) ဦး အနက်အချို့သည် သံသယရောဂါလက္ခဏာများရှိသော်လည်း အချို့တွင် ရောဂါလက္ခဏာတစ်စုံတစ်ရာမရှိခဲ့ဘဲ ဓာတ်ခွဲအတည်ပြုလူနာနှင့် ထိတွေ့ခဲ့သဖြင့် ဓာတ်ခွဲစစ်ဆေးခဲ့ရာ၌ COVID-19 ရောဂါဗိုင်းရပ်စ်ပိုးရှိမှုကို တွေ့ရှိခဲ့ခြင်းဖြစ်ပါသည်။
• ထို့အပြင် ရောဂါဖြစ်ပွားကူးစက်မှုများပြားရာနိုင်ငံမှ ပြန်လာခဲ့ပြီး အသွားအလာကန့်သတ်မှုခံရသူတွင် ရောဂါလက္ခဏာတစ်စုံတစ်ရာမရှိသော်လည်း ဓာတ်ခွဲစစ်ဆေးခဲ့ရာ ၌ COVID-19 ရောဂါပိုးရှိကြောင်းတွေ့ရှိခဲ့ခြင်းလည်း ရှိပါသည်။
• ထို့အတွက် အသွားအလာကန့်သတ်စောင့်ကြပ်ကြည့်ရှုခြင်း (quarantine) ခံရသူများ၏ ရာခိုင်နှုန်းအချို့တွင် ရောဂါလက္ခဏာတစ်စုံတစ်ရာမရှိသော်လည်း ရောဂါပိုးရှိနေနိုင်ပြီး အခြားသူများထံသို့ ကူးစက်ဖြစ်ပွားစေနိုင်ပါသဖြင့် မိမိတို့အနေဖြင့် အထူးသတိထားရမည်ဖြစ်ပါသည်။
• သို့ဖြစ်ပါ၍ အသွားအလာကန့်သတ်စောင့်ကြပ်ကြည့်ရှုခြင်း (quarantine) ခံရသူများအနေဖြင့် သတ်မှတ်ထားသော စည်းကမ်းများကို တိကျစွာလိုက်နာဆောင်ရွက်ကြရမည်ဖြစ်ပါသည်။
• အသွားအလာကန့်သတ်စောင့်ကြပ်ကြည့်ရှုရာနေရာ (quarantine site) များကို ကြီးကြပ်ဆောင်ရွက်သူများအနေဖြင့်လည်း အသွားအလာကန့်သတ်စောင့်ကြပ်ကြည့်ရှုခြင်း (quarantine) ခံရသူများ စည်းကမ်းလိုက်နာမှုရှိစေရေး သေချာစွာကြီးကြပ် ဆောင်ရွက်ပေးရမည်ဖြစ်ပါသည်။
• လာမည့် (၂) ပတ်မှ (၄) ပတ်တာကာလခန့်၌ မိမိတို့နိုင်ငံအတွင်း COVID-19 မည်မျှ ဖြစ်ပွားကူးစက်လာမည်ဆိုသည့် အတိုင်းအတာ၊ ပမာဏသည် အသွားအလာကန့်သတ်ကာ သတ်မှတ်နေရာများ၌ စောင့်ကြပ်ကြည့်ရှုခြင်း (quarantine) လုပ်ငန်းများနှင့် စပ်လျဉ်း၍မည်မျှအထိ ထိရောက်စွာ စီမံခန့်ခွဲနိုင်သည်ဆိုသည့် အချက်အပေါ် အဓိက မူတည်နေပါသည်။
• သို့ဖြစ်ပါ၍ အသွားအလာကန့်သတ်စောင့်ကြပ်ကြည့်ရှုရာနေရာ (quarantine site) များ၌ လက်ကိုင်အသံချဲ့စက်ငယ်များအသုံးပြု၍ ကျန်းမာရေးအသိပညာပေးခြင်းကို အကြိမ်ရေတိုးမြှင့်၍ မဖြစ်မနေဆောင်ရွက်ကြရမည် ဖြစ်ပါသည်။
• ဝန်ကြီးဌာနအနေဖြင့် ရောဂါဖြစ်ပွားသူများအားလုံးကို စောစီးစွာသိရှိဖော်ထုတ်၊ ကုသမှုပေးနိုင်ရန်အတွက် သံသယ/စောင့်ကြည့်လူနာများ၊ ရောဂါရှိသူနှင့် ထိတွေ့သူများအားလုံးကို ပထမဦးစားပေး၍ ဓာတ်ခွဲစစ်ဆေးသွားမည်ဖြစ်ပါသည်။
• ထို့အပြင် အသွားအလာကန့်သတ်စောင့်ကြပ်ကြည့်ရှုခြင်း (quarantine) ခံရသူများအတွင်း ရောဂါ၏ အတိမ်အနက်၊ ရောဂါလက္ခဏာတစ်စုံတစ်ရာမပြသပဲ ရောဂါပိုးရှိသူများ၏ အရေအတွက်ကို ယေဘုယျအားဖြင့် သိရှိနိုင်ရန်အတွက် ရာခိုင်နှုန်းအချိုးအစားတစ်ခုအား သုတေသန (implementation research) ပုံစံဖြင့် ဓာတ်ခွဲစစ်ဆေးမှုများ တိုးမြှင့်ဆောင်ရွက်သွားမည်ဖြစ်ပါသည်။
• COVID-19 ကပ်ရောဂါကို အောင်မြင်စွာကျော်လွှားနိုင်ရန်အတွက် ယခုလာမည့် (၄) ပတ် တာကာလအတွင်း ပြည်သူများက ဆက်လက်ပူးပေါင်းပါဝင်ဆောင်ရွက်ကြပါရန် တိုက်တွန်းနှိုးဆော်အပ်ပါသည်။
ပြည်ထောင်စုဝန်ကြီး
ကျန်းမာရေးနှင့်အားကစားဝန်ကြီးဌာန
Author: MOHS-Admin
Last modified on Thursday, 09 Apr 2020