MINISTRY OF HEALTH

Union Minister Dr. Myint Htwe receives the Myanmar Maternal and Child Welfare Association’s donation for the preparedness activities for detection and response to COVID-19 acute respiratory disease

နေပြည်တော်၊ (၂၀၂၀) ပြည့်နှစ်၊ ဖေဖော်ဝါရီလ (၁၈) ရက်

ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးသည် ယနေ့၊ နံနက်ပိုင်းတွင် ကျန်းမာရေးနှင့်အားကစားဝန်ကြီးဌာန၊ ရုံးအမှတ် (၄)၊ နေပြည်တော်၌ မြန်မာနိုင်ငံ မိခင်နှင့်ကလေး စောင့်ရှောက်ရေးအသင်းမှ COVID-19 လတ်တလော အသက်ရှုလမ်းကြောင်းဆိုင်ရာ ရောဂါကာကွယ်ထိန်းချုပ်ရေးလုပ်ငန်းများအတွက် ဝန်ကြီးဌာနထံ လှူဒါန်းငွေ ကျပ်သိန်း (၁၀၀) ကို လက်ခံခဲ့ပါသည်။

ထိုသို့ လှူဒါန်းမှု အကြောင်းအရာကို မြန်မာနိုင်ငံ မိခင်နှင့်ကလေး စောင့်ရှောက်ရေးအသင်း၊ ဥက္ကဋ္ဌ ပါမောက္ခဒေါက်တာစန်းစန်းမြင့်အောင်နှင့် ဗဟိုအလုပ်အမှုဆောင်များက ပြောကြားရာတွင် -

• ယခုလှူဒါန်းငွေ ကျပ်သိန်း (၁၀၀)ကို ကျန်းမာရေးနှင့်အားကစားဝန်ကြီးဌာန၏ COVID-19 လတ်တလော အသက်ရှုလမ်းကြောင်းဆိုင်ရာ ရောဂါကာကွယ်ထိန်းချုပ်ရေးလုပ်ငန်းများတွင် အသုံးပြုနိုင်ရန် လှူဒါန်းခြင်းဖြစ်ပါကြောင်း၊

• ဝန်ကြီးဌာန၏ အင်တာနက်စာမျက်နှာကိုလည်း ပုံမှန်ကြည့်ရှု၍ လုပ်ငန်းဆောင်ရွက် နေမှုများကို တွေ့ရှိသိမြင်ပါကြောင်း၊

• မြန်မာနိုင်ငံ မိခင်နှင့်ကလေး စောင့်ရှောက်ရေးအသင်းအနေဖြင့် ဝန်ကြီးဌာနနှင့် ပူးပေါင်း၍ ရောဂါကာကွယ်ထိန်းချုပ်ရေးလုပ်ငန်းများတွင် ပါဝင်ဆောင်ရွက်သွားမည်ဖြစ်ပါကြောင်း၊ အထူးသဖြင့် ကျန်းမာရေးအသိပညာပေးနှိုးဆော်ခြင်းလုပ်ငန်းများတွင် ပါဝင်ဆောင်ရွက် သွားမည်ဖြစ်ပါကြောင်း၊

• ပြည်သူများ လက်ဆေးသန့်စင်ခြင်းများ လွယ်လင့်တကူ လက်လှမ်းမီပြုလုပ်နိုင်ရန်အတွက်လည်း ဆောင်ရွက်သွားမည်ဖြစ်ပါ ကြောင်း၊
• တိုင်းဒေသကြီး/ ပြည်နယ်များတွင် မိခင်နှင့်ကလေး စောင့်ရှောက်မှုလုပ်ငန်းများ ဆောင်ရွက်ရာတွင်လည်း ဝန်ကြီးဌာနနှင့် ပူးပေါင်း၍ ဆက်လက်ဆောင်ရွက်သွား မည်ဖြစ်ပါကြောင်းပြောကြားခဲ့ပါသည်။

ပြည်ထောင်စုဝန်ကြီးက ပြောကြားရာတွင် -

• ယခုကဲ့သို့ လှူဒါန်းမှုနှင့် လုပ်ငန်းများ ပူးပေါင်းဆောင်ရွက်မှုတို့ကို ကျေးဇူးတင်ရှိပါကြောင်း၊

• ဝန်ကြီးဌာနအနေဖြင့် ရောဂါကာကွယ်ထိန်းချုပ်ရေးလုပ်ငန်းများတွင် ကျန်းမာရေးအသိပညာပေးနှိုးဆော်ခြင်းလုပ်ဆောင်ရာ၌ မြန်မာ၊ ကချင်၊ ရှမ်းနှင့် တရုတ်ဘာသာများဖြင့် လက်ကမ်းစာစောင်၊ ပိုစတာများ ပြုစုဖြန့်ဝေထားရှိပါကြောင်း၊

• ရောဂါစတင်ဖြစ်ပွားသည့် တရုတ်ပြည်သူ့သမ္မတနိုင်ငံနှင့် ဆက်စပ်လျက်ရှိသော နေရာဒေသများတွင် ကချင်ဘာသာ၊ ရှမ်းဘာသာနှင့် တရုတ်ဘာသာ အသီးသီးဖြင့် ပြုစုထားသော ကျန်းမာရေးအသိပညာအချက်အလက်များသည် များစွာ အသုံးဝင်ထိရောက်မည်ဖြစ်ပါကြောင်း၊

• ပြန်ကြားရေးဝန်ကြီးဌာန၏ ပံ့ပိုးမှုဖြင့် ရုပ်မြင်သံကြားနှင့် ရေဒီယိုတို့မှ တိုင်းရင်းသားဘာသာ (၁၁) မျိုးဖြင့်လည်း ရောဂါကာကွယ်ရေး ကျန်းမာရေးအသိပညာအချက်အလက်များ ဖြန့်ဝေပေးလျက်ရှိပါကြောင်း၊

• ရောဂါကာကွယ်ရန်အတွက် ရေနှင့်ဆပ်ပြာအသုံးပြုပြီး လက်ကိုမကြာခဏ စနစ်တကျဆေးကြောခြင်းနှင့် ရေမရရှိနိုင်ပါက Alcohol ပါဝင်သောလက်သန့်စင်ဆေးရည်ကို အသုံးပြုပြီး လက်ဆေးသန့်စင်ခြင်းတို့သည် အထိရောက်ဆုံးဖြစ်သည်ကို ပြည်သူများသိရှိကြရန် လိုအပ်ကြောင်း၊

• ထို့အပြင် လူစုလူဝေးများပြားသော နေရာများကို ယခုကာလအတွင်း တတ်နိုင်သမျှရှောင်ကြဉ်ခြင်းဖြင့် ရောဂါကူးစက်ခံရနိုင်ခြေကို များစွာ လျှော့ချနိုင်မည်ဖြစ်ပါကြောင်း၊

• ရောဂါကာကွယ်ထိန်းချုပ်ရေးလုပ်ငန်းများတွင် သီးခြားထားရှိကုသခြင်း (Isolation) နှင့် အသွားအလာတားမြစ်ပိတ်ပင်ခြင်း၊ ကန့်သတ်ခြင်း (Quarantine) ၏ အရေးကြီးမှုကို ပြည်သူများ သေချာစွာသိရှိနားလည်ရန်မှာ အရေးကြီးပါကြောင်း၊

• အမျိုးသားကျန်းမာရေးဓာတ်ခွဲမှုဆိုင်ရာဌာန (NHL) သည် လူနာများထံမှဓာတ်ခွဲနမူနာများတွင် COVID-19 ဗိုင်းရပ်(စ်)ရောဂါပိုး ရှိ၊ မရှိ အား ကမ္ဘာ့ကျန်းမာရေးအဖွဲ့၏ ရည်ညွှန်းဓာတ်ခွဲခန်း နှင့် တစ်ပြိုင်နက်ဓာတ်ခွဲစစ်ဆေး (parallel testing) လျက်ရှိရာတွင် အဖြေများသည် ကိုက်ညီမှုရှိပါကြောင်း၊

• ထိုသို့ တစ်ပြိုင်နက် ဓါတ်ခွဲစစ်ဆေးမှုအရေအတွက်နှင့် အဖြေများ ကိုက်ညီမှန်ကန်မှု ရှိသည့်အတွက် ကိုယ်တိုင်သီးခြားဓါတ်ခွဲစစ်ဆေးခြင်း (independent testing) ကို အမျိုးသားကျန်းမာရေးဓါတ်ခွဲမှုဆိုင်ရာဌာန (NHL) မှ (၂၀-၂-၂၀၂၀) ရက်နေ့တွင် စတင် ဆောင်ရွက်တော့မည်ဖြစ်ပါကြောင်း၊

• ဝန်ကြီးဌာန၊ အမျိုးသားကျန်းမာရေးဓာတ်ခွဲမှုဆိုင်ရာဌာနမှ ဝန်ထမ်းပညာရှင်များအပါအဝင် ဝန်ထမ်းများအားလုံးသည် ရောဂါကာကွယ်ထိန်းချုပ်ရေးလုပ်ငန်းများကို အစွမ်းကုန်ကြိုးပမ်းဆောင်ရွက်နေကြပါကြောင်း၊

• တိုင်းဒေသကြီး/ ပြည်နယ်များတွင် ဝန်ကြီးဌာနနှင့် မြန်မာနိုင်ငံ မိခင်နှင့်ကလေး စောင့်ရှောက်ရေးအသင်းတို့ ပူးပေါင်းဆောင်ရွက်မှုများ ပိုမိုကောင်းမွန်စေရေးအတွက် ဒုတိယညွှန်ကြားရေးမှူးချုပ် (မိခင်၊ ကလေး၊ ကျောင်းကျန်းမာ၊ အာဟာရ) နှင့် ယနေ့ပင်တွေ့ဆုံ ဆွေးနွေးစေလိုပါကြောင်း၊

• ဝန်ကြီးဌာနအနေဖြင့် မြန်မာနိုင်ငံ မိခင်နှင့်ကလေး စောင့်ရှောက်ရေးအသင်းအပါအဝင် မိတ်ဖိတ်အဖွဲ့အစည်းများ အားလုံး၏ ပူးပေါင်းပါဝင်ဆောင်ရွက်မှုများကို ကျေးဇူးတင်ရှိပါကြောင်းပြောကြားခဲ့ပါသည်။

ထို့နောက် မြန်မာနိုင်ငံ မိခင်နှင့်ကလေး စောင့်ရှောက်ရေးအသင်းမှ COVID-19 လတ်တလော အသက်ရှုလမ်းကြောင်းဆိုင်ရာ ရောဂါကာကွယ်ထိန်းချုပ်ရေးလုပ်ငန်းများအတွက် ဝန်ကြီးဌာနထံသို့ လှူဒါန်းသည့် ကျပ်သိန်း (၁၀၀) ကို ပြည်ထောင်စုဝန်ကြီး၊ အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ် ဒေါက်တာသာထွန်းကျော်၊ ပြည်သူ့ကျန်းမာရေးနှင့်ကုသရေးဦးစီးဌာန၊ ညွှန်ကြားရေးမှူးချုပ် ဒေါက်တာစိုးဦး၊ ဒုတိယအမြဲတမ်းအတွင်းဝန် ဦးစိန်ဝင်းတို့က လက်ခံခဲ့ပါသည်။