MINISTRY OF HEALTH

တောင်ကြီးမြို့၊ (၂၀၁၉) ခုနှစ်၊ စက်တင်ဘာလ (၁၆) ရက်

     MDSR Review Workshop ကို တောင်ကြီးမြို့၊ ပြည်နယ်ကုသရေးနှင့် ပြည်သူ့ကျန်းမာရေးဦးစီးဌာန၊ အစည်းအဝေးခန်းမ၌ (၁၄-၉-၂၀၁၉)မှ (၁၅-၉-၂၀၁၉) ရက်နေ့အထိ ကျင်းပပြုလုပ်ခဲ့ပြီး အဆိုပါအခမ်းအနားသို့ စဝ်စံထွန်းဆေးရုံကြီးနှင့် အမျိုးသမီးနှင့်ကလေးဆေးရုံကြီးများမှ ဆေးရုံအုပ်ကြီးများ၊ ပုဂ္ဂလိကဆေးရုံများမှ ဆေးရုံအုပ်များ၊ သားဖွား/ မီးယပ်အထူးကုဆရာဝန်များ၊ ပြည်နယ်ကုသရေးနှင့် ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူးများနှင့် အဖွဲ့ခေါင်းဆောင်ဆရာဝန်များ တက်ရောက်ခဲ့ပါသည်။ အခမ်းအနားတွင် ပြည်နယ်ကုသရေးနှင့်ပြည်သူ့ကျန်းမာရေးဦးစီးဌာနမှူးက အဖွင့်အမှာစကားပြောကြားပြီး မိခင်သေဆုံးမှုဆိုင်ရာ စောင့်ကြပ်ကြည့်ရှု တုံ့ပြန်ဆောင်ရွက်ခြင်း(MDSR) ကော်မတီဖွဲ့စည်းရခြင်းနှင့် ကော်မတီ၏ လုပ်ငန်းတာဝန်များကို ရှင်းလင်းပြောကြားပါသည်။

     ပြည်နယ်ကုသရေးနှင့်ပြည်သူ့ကျန်းမာရေးဦးစီးဌာနမှ လက်ထောက်ညွှန်ကြားရေးမှူး (မိခင်/ကလေး/ကျောင်းကျန်းမာ/အာဟာရ) ဒေါက်တာမေမင်းသိမ့်က မိခင်သေဆုံးမှုနှင့် ပတ်သက်သော အချက်အလက်များနှင့် ယခုလက်ရှိဆောင်ရွက်နေသော မိခင်နှင့်မျိုးဆက်ပွားကျန်းမာရေးဌာနခွဲမှ လုပ်ငန်းများအကြောင်းအား ရှင်းလင်းတင်ပြပါသည်။ ဆက်လက်ပြီး အဖွဲ့ခေါင်းဆောင်ဆရာဝန်(မိခင်ကျန်းမာ) ဒေါက်တာသက်သက်ဝင်းက ၂၀၁၉ခုနှစ်၊ ပထမ(၆)လပတ်အတွင်း မိခင်သေဆုံးမှုများအကြောင်းဆွေးနွေးတင်ပြပြီး မိခင်သေဆုံးမှုရှိသော မြို့နယ်များမှ မိခင်သေဆုံးမှုဖြစ်စဉ်များကို တင်ပြကြပါသည်။ ထို့နောက် တောင်ကြီးမြို့၊ အမျိုးသမီးနှင့်ကလေးဆေးရုံကြီးမှ တွဲဖက်ပါမောက္ခ ဒေါက်တာမြတ်သီတာက မိခင်သေဆုံးသည့် အကြောင်းရင်းများကို ပြန်လည်ဆွေးနွေးပေးခဲ့ပြီး အဆိုပါဆွေးနွေးပွဲကို (၂) ရက်တာ ကျင်းပပြုလုပ်ခဲ့ပါသည်။