MINISTRY OF HEALTH

ပုသိမ်                                  ဇန်နဝါရီ (၂၁)

     ပြည်သူ့ကျန်းမာရေးဦးစီးဌာန၊ ဒုတိယညွှန်ကြားရေးမှူးချုပ် (သဘာဝဘေး) ဒေါက်တာသန်းထွန်းအောင်သည် ယနေ့ နံနက် (၉)နာရီက ဧရာဝတီတိုင်းဒေသကြီး ပြည်သူ့ကျန်းမာရေးဦးစီးဌာနမှ ဝန်ထမ်းများနှင့်တွေ့ဆုံ၍ တိုင်းဒေသကြီးအတွင်း ဆောင်ရွက်မည့် ဆင်ခြေထောက်ရောဂါကင်းဝေးရေး လူအားလုံး ဆေးကျွေးခြင်းလုပ်ငန်းအတွက် လမ်းညွှန်အမှာစကား ပြောကြားပါသည်။ တိုင်းဒေသကြီး ပြည်သူ့ကျန်းမာရေးဦးစီးဌာနမှူး ဒေါက်တာ အောင်ကျော်ထွေးနှင့် လက်ထောက်ညွှန်ကြားရေးမှူး ဒေါက်တာမြတ်မင်းထွန်းတို့မှ လုပ်ငန်းစီမံချက်များအတိုင်း စီစဉ်ထားရှိမှု အခြေအနေကို ရှင်းလင်း တင်ပြပါသည်။ ဒုတိယညွှန်ကြားရေးမှူးချုပ်က လုပ်ငန်း အောင်မြင်စွာဆောင်ရွက်နိုင်ရေး လိုအပ်သည်များကို ဖြည့်စွက်မှာကြားပါသည်။

     ဆက်လက်၍ ပုသိမ်မြို့နယ် ပြည်သူ့ကျန်းမာရေးဦးစီးဌာနသို့ ရောက်ရှိပြီး မြို့နယ်ပြည်သူ့ကျန်းမာရေးဦးစီးဌာနမှူး ဒေါက်တာတင်ဝင်းအောင်နှင့် အခြေခံကျန်းမာရေးဝန်ထမ်းများနှင့်တွေ့ဆုံပြီး ဆင်ခြေထောက်ရောဂါကင်းဝေးရေး လူအားလုံး ဆေးကျွေးခြင်းလုပ်ငန်း စီစဉ်ထားမှု အခြေအနေများကို စစ်ဆေးပါသည်။ ယနေ့နေ့လည်ပိုင်းတွင် ဟင်္သာတမြို့သို့ရောက်ရှိပြီး မြို့နယ် ပြည်သူ့ကျန်းမာရေးဦးစီးဌာန ဝန်ထမ်းများ နှင့်တွေ့ဆုံပြီး စီမံချက် အကြို ပြင်ဆင်ထားမှု အခြေအနေကို ကြည့်ရှု စစ်ဆေးပါသည်။ ဆက်လက်၍ ဟင်္သာတမြို့ ဘေးအန္တရာယ် စီမံခန့်ခွဲရေး သင်တန်းကျောင်းသို့ ရောက်ရှိပြီး တာဝန်ရှိသူများနှင့် တွေ့ဆုံခဲ့ကြောင်း သတင်းရရှိပါသည်။