နေပြည်တော်၊ (၂၀၁၈) ခုနှစ်၊ သြဂုတ်လ (၁၆)ရက်နေ့
ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးသည် ယနေ့၊ ညနေပိုင်းတွင် ကျန်းမာရေးနှင့်အားကစားဝန်ကြီးဌာန၊ ရုံးအမှတ် (၄)ရှိ ဧည့်ခန်းမ၌ ထိုင်းနိုင်ငံရှိ တက္ကသိုလ်များတွင် Medical Technology ပါရဂူဘွဲ့သင်တန်းတက်ရောက်မည့် ဒေါ်မြင့်မြင့်စိန် (လက်ထောက်ကထိက၊ ဆေးဘက်ဆိုင်ရာနည်းပညာတက္ကသိုလ်၊ ရန်ကုန်)၊ Human Movement in Science ပါရဂူဘွဲ့သင်တန်းတက်ရောက်မည့် ဒေါ်စစ်ငြိမ်းဖြူ (ဆေးဘက်ကျွမ်းကျင် - ၂၊ အမျိုးသားပြန်လည်သန်စွမ်းရေးဆေးရုံ၊ ရန်ကုန်)နှင့် Medical Technology မဟာဘွဲ့သင်တန်းတက်ရောက်မည့် ဒေါ်ပြည့်မွန်ကျော် (သရုပ်ပြ၊ ဆေးဘက်ဆိုင်ရာနည်းပညာတက္ကသိုလ်၊ မန္တလေး) တို့ကိုလက်ခံတွေ့ဆုံ၍ သြဝါဒလမ်းညွှန် စကားပြောကြားခဲ့ပါသည်။
ပြည်ထောင်စုဝန်ကြီး ပြောကြားရာတွင် -
- ပညာတော်သင်များသည် နိုင်ငံကို ကိုယ်စားပြုသွားရောက်သူများဖြစ်သောကြောင့် နိုင်ငံတကာတွင် ဂုဏ်သိက္ခာနှင့်အညီ ပြုမူပြောဆိုနေထိုင်ကြစေလိုကြောင်း၊
- အင်္ဂလိပ်ဘာသာစကားကို အသုံးပြု၍ သင်ယူခြင်း၊ ပြောဆိုဆက်ဆံခြင်းများပြုလုပ်ကြရမည်ဖြစ်သဖြင့် အင်္ဂလိပ်ဘာသာစကားကို ယခုထက်ပိုမိုကျွမ်းကျင်တတ်မြောက်စေရန် လေ့ကျင့်စေလိုကြောင်း၊
- သက်ဆိုင်ရာ ဘာသာရပ်သင်ကြားသင်ယူရာ၌လည်း နိုင်ငံတကာကျောင်းသားများနှင့် ရင်ဘောင်တန်းနိုင်ရေး ကြိုးစားသင်ယူကြစေလိုကြောင်း၊
- သက်ဆိုင်ရာနိုင်ငံ၏ ယဉ်ကျေးမှု ဓလေ့စရိုက်ကို လေ့လာ၍ လေးစားရန်လိုပြီး အခြားကျောင်းသား၊ ကျောင်းသူများ၊ ဆရာ၊ ဆရာမများနှင့် ဆက်ဆံရေးကောင်းမွန်စွာနေထိုင်ကြစေလိုကြောင်း၊
- ပညာတော်သင်များအနေဖြင့် မိမိသွားရောက်မည့် နိုင်ငံရှိ မြန်မာနိုင်ငံသံရုံးကို သတင်းပေးပို့ချိတ်ဆက်ရမည်ဖြစ်ကြောင်း၊
- ဌာနဆိုင်ရာ စည်းမျဉ်းစည်းကမ်းများ၊ လုပ်ထုံးလုပ်နည်းများကို လိုက်နာဆောင်ရွက်ကြရမည်ဖြစ်ကြောင်း တို့ကိုပြောကြားခဲ့ပါသည်။