ယနေ့ဆွေးနွေးပွဲသည် တိုင်းရင်းဆေးဖွံ့ဖြိုးတိုးတက်ရေးအတွက် အလွန်အရေးကြီးသည့် ဆွေးနွေးပွဲဖြစ်ကြောင်း၊ ပြည်သူများအတွက် အမှန်တကယ်အကျိုးရှိပြီး ယုံကြည်စိတ်ချရသည့် တိုင်းရင်းဆေးဝါးများ ထုတ်လုပ်နိုင်ရန်အတွက် တိုင်းရင်းဆေးပညာဦးစီးဌာနမှတာဝန်ရှိသူများ၊ တိုင်းရင်းဆေးပညာရှင်ကြီးများ၊ တိုင်းရင်းဆေးဝါးထုတ်လုပ်သူများနှင့် ပါဝင်တက်ရောက်သူအားလုံးအနေဖြင့် ရှုထောင့်ပေါင်းစုံမှ ပွင့်ပွင့်လင်းလင်းဆွေးနွေးကြရန်ဖြစ်ပါကြောင်းဖြင့် ဧပြီလ(၂၇)ရက်၊ နံနက်(၈:၀၀)နာရီတွင် နေပြည်တော်ရှိ ကျန်းမာရေးနှင့်အားကစားဝန်ကြီးဌာန၌ ကျင်းပသော တိုင်းရင်းဆေးဝါးများ မှတ်ပုံတင်ခြင်း၊ ထုတ်လုပ်ခြင်း၊ ထုတ်လုပ်ခွင့်လိုင်စင် လျှောက်ထားခြင်း၊ သက်တမ်းတိုးဆောင်ရွက်ခြင်းဆိုင်ရာ စည်းကမ်းသတ်မှတ်ချက်များ ရှင်းလင်းဆွေးနွေးပွဲတွင် ပြည်ထောင်စုဝန်ကြီး ဒေါက်တာမြင့်ထွေး က ပြောကြား သည်။
တိုင်းရင်းဆေးဝါးထုတ်လုပ်ရေးလုပ်ငန်းများသည် တိုင်းပြည်၏စီးပွားရေးဖွံ့ဖြိုးတိုးတက်မှုနှင့် ဆက်စပ်နေပါကြောင်း၊ တိုင်းရင်းဆေးဝါးထုတ်လုပ်ရေးလုပ်ငန်းများ အဆင်မပြေပါက ပရဆေး စိုက်ပျိုးသူ တောင်သူများ၊ ပရဆေးကုန်ကြမ်းရောင်းချသူများ၊ အလုပ်သမားများ၊ အခြားဆက်စပ်လျက် ရှိသောစီးပွားရေးလုပ်ငန်းများထိခိုက်နိုင်ပြီး ပြည်သူလူထုအနေဖြင့်လည်း လက်တွေ့ထိရောက်မှုရှိပြီး အန္တရာယ်ကင်း သော တိုင်းရင်းဆေးဝါးကောင်းများကို သုံးစွဲရတော့မည်မဟုတ်ပါကြောင်း၊
ထုတ်လုပ်ရာတွင်လည်း ကောင်းမွန်သောထုတ်လုပ်မှုကျင့်စဉ် (GMP) များကို တတ်နိုင်သမျှ ဦးစားပေးလိုက်နာပြီးထုတ်လုပ်ကြရန်လိုအပ်ပါကြောင်း၊ လက်တွေ့ကျသည့် တိုင်းရင်းဆေး သုတေသနများကို ယခုထက်ပိုမိုဆောင်ရွက်ကြရန် လိုအပ်ပါကြောင်း၊ သုတေသနမရှိဘဲ တိုင်းရင်းဆေးလောက ဖွံ့ဖြိုးတိုးတက်လာမည်မဟုတ်ပါကြောင်း၊ တိုင်းရင်းဆေးသုတေသန လုပ်ငန်းများဆောင်ရွက်ရာတွင်လည်း ဆေးသုတေသနဦးစီးဌာန၊ အစားအသောက်နှင့်ဆေးဝါး ကြီးကြပ်ကွပ်ကဲရေးဦးစီးဌာနတို့နှင့် ပူးပေါင်းဆောင်ရွက်ကြရန်ဖြစ်ပါကြောင်း၊ တိုင်းရင်းဆေးပညာ ဖွံ့ဖြိုးတိုးတက်ရေးအတွက် မြန်မာ့တိုင်းရင်းဆေး သမားတော်ကြီးများ၏ အကြံဉာဏ်များကိုလည်း မဖြစ်မနေရယူဆောင်ရွက်ကြရန်လိုအပ်ပါကြောင်း၊ တိုင်းရင်းဆေးပညာအတွက် လိုအပ်သော တိုင်းရင်းဆေးသမားကောင်းများပေါ်ထွက်လာစေရန် တိုင်းရင်းဆေးပညာဦးစီးဌာန၊ တိုင်းရင်းဆေး တက္ကသိုလ်၏အခန်းကဏ္ဌသည် အလွန်အရေးကြီးပါကြောင်း၊ တိုင်းရင်းဆေးဝါးလုပ်ငန်းရှင်များမှလည်း ပံ့ပိုးပေးရန်လိုအပ်ပါကြောင်း၊
တိုင်းရင်းဆေးဥပဒေကိုလည်း ပြန်လည်သုံးသပ်ရန်လိုအပ်မည်ဖြစ်ပါကြောင်း၊ တိုင်းရင်းဆေးဝါးများထုတ်လုပ်ရာတွင် ပြည်တွင်းသုံးစွဲမှုကိုအဓိကထား၍ စစ်မှန်သောဆေးဝါးများရရှိရေး ဆောင်ရွက်ကြရန် ဖြစ်ပါကြောင်း၊
တိုင်းရင်းဆေးသမားတော်များနှင့် တိုင်းရင်းဆေးဝါးလုပ်ငန်းရှင်များကလည်း တိုင်းရင်းဆေးများထုတ်လုပ်သည့်အခါ တိုင်းရင်းဆေးဝါးဆိုင်ရာတည်ဆဲဥပဒေ၊ စည်းမျဉ်းစည်းကမ်း၊ လုပ်ထုံးလုပ်နည်း၊ အမိန့်ကြော်ငြာစာများနှင့်အညီ တိုင်းရင်းဆေးဝါးမှတ်ပုံတင်ခြင်းဆိုင်ရာ အချက်အလက်များ၊ မှတ်ပုံတင်ရရှိသူများ လိုက်နာရမည့်အချက်များ၊ အမှတ်တံဆိပ်ပြုလုပ်ခြင်းဆိုင်ရာ လိုက်နာရမည့်အချက်များ၊ တိုင်းရင်းဆေးဝါးများကြော်ငြာခြင်းများ၊ ဆေးအမည်ခေါ်ဝေါ်သုံးစွဲမှုများ၊ ဆေးတစ်ဖုံတွင်ပါဝင်သော ဆေးပစ္စည်းများတွင်ပါဝင်သောအလေးချိန်၊ အချင်အတွယ်ဆိုင်ရာများ၊ ပါဝင်မှုရာခိုင်နှုန်းအရ သတ်မှတ် ကန့်သတ်ထားသောဆေးပစ္စည်းများ၊ Heavy Metal ပစ္စည်းများ၊ သုဒ္ဓပြုရန် လိုအပ်သောဆေးပစ္စည်းများ၊ သုံးစွဲနိုင်သောရောဂါများ စသည်တို့ကို သတ်မှတ်ထားသည့်စည်းမျဉ်းများအတိုင်း လိုက်နာ ဆောင်ရွက်ကြရန်ဖြစ်ပါကြောင်း
အမိန့်ကြော်ငြာစာများ၊ စည်းမျဉ်းစည်းကမ်းများအနေဖြင့် တင်းကျပ်မှုများလွန်းလျှင် တစ်ဘက်က ထုတ်လုပ်မှု၊ရောင်းချမှုစသည့် တိုင်းရင်းဆေးဆိုင်ရာတိုးတက်မှုများကို ထိခိုက်စေနိုင်သည်ဖြစ်၍ ပြည်သူ အတွက်ဦးထိပ်ထားကာ တိုင်းရင်းဆေးဝါးကောင်းများရရှိရေးကို ကျင့်ဝတ်များအတိုင်း ဆောင်ရွက်ကြရန်ဖြစ်ပါကြောင်း၊
ယနေ့ဆွေးနွေးပွဲမှရရှိလာမည့် ရလဒ်များကိုအခြေခံကာ တိုင်းရင်းဆေးလောကတိုးတက်အောင် ဆောင်ရွက်နိုင်မည်ဟု ယုံကြည်ပါကြောင်း၊ ယနေ့သည် တိုင်းရင်းဆေးလောကတိုးတက်မှုအတွက် ရောင်နီသန်း လာသောနေ့တစ်နေ့ဟု ဆိုလိုချင်ပါကြောင်းဖြင့် ပြောကြားသည်။
ယင်းနောက် တိုင်းရင်းဆေးပညာဦးစီးဌာန၊ ညွှန်ကြားရေးမှူး(ဆေးဝါး/ဥယျာဉ်)နှင့် တာဝန်ရှိ သူများက တိုင်းရင်းဆေးဝါးမှတ်ပုံတင်ခြင်း၊ တိုင်းရင်းဆေးဝါးထုတ်လုပ်ခြင်း၊ တိုင်းရင်းဆေးဝါး ကြီးကြပ်သူ ခန့်ထားခြင်း၊ တိုင်းရင်းဆေးဝါးမှတ်ပုံတင်နှင့် ထုတ်လုပ်ခွင့်လိုင်စင်လျှောက်ထားခြင်း၊ တိုင်းရင်းဆေးဝါးများဆိုင်ရာ အစဉ်အလာသတ်မှတ်ချက်များ၊ တိုင်းရင်းဆေးဝါးမှတ်ပုံတင်ခြင်းနှင့် ထုတ်လုပ်ခွင့် လိုင်စင်လျှောက်ထားရာတွင် တွေ့ရှိရသည့်လိုအပ်သောအချက်များ၊ တိုင်းရင်းဆေးဝါး ဓါတ်ခွဲစစ်ဆေးခြင်း၊ တိုင်းရင်းဆေးဝါးကြော်ငြာကိစ္စရပ်များကို ရှင်းလင်းဆွေးနွေးသည်။
ထို့နောက် ဆွေးနွေးပွဲတက်ရောက်လာသော တိုင်းရင်းဆေးဝါးထုတ်လုပ်ရေးလုပ်ငန်းရှင်များက သိရှိလိုသောအချက်များနှင့် တိုင်းရင်းဆေးဝါးထုတ်လုပ်ရေးဆိုင်ရာကိစ္စရပ်များကို အကြံပြုဆွေးနွေးကြရာ တိုင်းရင်းဆေးပညာဦးစီးဌာန၊ ညွှန်ကြားရေးမှူးချုပ် ဒေါက်တာရီရီမြင့်က ပြန်လည်ရှင်းလင်း ဆွေးနွေးခဲ့သည်။
အဆိုပါဆွေးနွေးပွဲသို့ ပြည်သူ့လွှတ်တော်၊ ကျန်းမာရေးနှင့်အားကစားဖွံ့ဖြိုးတိုးတက်ရေး ကော်မတီဝင်ဦးမြင့်ဦး၊ ကျန်းမာရေးနှင့်အားကစားဝန်ကြီးဌာန၊ အမြဲတမ်းအတွင်းဝန် ပါမောက္ခ ဒေါက်တာသက်ခိုင်ဝင်း၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ တိုင်းဒေသကြီး/ပြည်နယ်၊ ခရိုင်တိုင်းရင်းဆေးပညာဦးစီးမှူးများ၊ တိုင်းရင်းဆေးဝါး ထုတ်လုပ်ရေး လုပ်ငန်းရှင်များ တက်ရောက်ခဲ့ကြသည်။
တိုင်းရင်းဆေးဝါးများ မှတ်ပုံတင်ခြင်း၊ ထုတ်လုပ်ခြင်း၊ ထုတ်လုပ်ခွင့်လိုင်စင်လျှောက်ထားခြင်း၊ သက်တမ်းတိုးဆောင်ရွက်ခြင်းဆိုင်ရာကိစ္စရပ်များနှင့် ပတ်သက်၍ စည်းကမ်းချက်များကို ထပ်မံ ရှင်းလင်းတင်ပြရန်၊ မျက်မှောက်ခေတ်ကာလအခြေအနေနှင့်ကိုက်ညီသော စည်းကမ်းသတ်မှတ် ချက်များအဖြစ် ပြင်ဆင်ထည့်သွင်းရန်ရှိသည်များကို ဆွေးနွေးသတ်မှတ်ဆောင်ရွက်သွားရန်၊ သတ်မှတ် ထားသော စည်းကမ်းချက်များကို ပြည်နယ်/တိုင်းဒေသကြီးအသီးသီးမှ တိုင်းရင်းဆေးဝါးကြီးကြပ်ရေး ကော်မတီဝင်များနှင့် တိုင်းရင်းဆေးဝါးထုတ်လုပ်သူများကို ထပ်ဆင့်အသိပေးရှင်းလင်းဆွေးနွေးရန်၊ လိုက်နာရမည့် စည်းကမ်းသတ်မှတ်ချက်များနှင့်ပတ်သက်၍ လုပ်ငန်းခွင်ဆိုင်ရာအခက်အခဲများကို တိုင်းရင်းဆေးဝါးထုတ်လုပ်သူများနှင့် တွေ့ဆုံဆွေးနွေးဖြေရှင်းသွားရန် စသည့်ရည်ရွယ်ချက်များဖြင့် ယခုဆွေးနွေးပွဲကို ကျင်းပရခြင်းဖြစ်သည်။