COVID-19 ရောဂါ စောင့်ကြပ်ကြည့်ရှုမှုနှင့်ပတ်သက်၍ သတင်းထုတ်ပြန်ခြင်း (6-3-2020, 8:00 PM)
၁။ ကျန်းမာရေးနှင့်အားကစားဝန်ကြီးဌာနသည် တရုတ်ပြည်သူ့သမ္မတနိုင်ငံနှင့် ကမ္ဘာ့နိုင်ငံ (၈၅) နိုင်ငံတွင် ကူးစက်ပျံ့နှံ့လျက်ရှိသည့် COVID-19 လတ်တလောအသက်ရှူလမ်းကြောင်းဆိုင်ရာ ရောဂါဖြစ်ပွားမှုဖြစ်စဉ်နှင့် ပတ်သက်၍ ရောဂါစောင့်ကြပ်ကြည့်ရှုခြင်း လုပ်ငန်းများအား အပြည်ပြည်ဆိုင်ရာ ဝင်ပေါက်၊ ထွက်ပေါက်ဂိတ်များတွင်လည်းကောင်း၊ ဆေးရုံအခြေပြုအဖြစ်လည်းကောင်း၊ ပြည်သူလူထုအခြေပြု စောင့်ကြပ်ကြည့်ရှုခြင်း လုပ်ငန်းများဖြင့်လည်းကောင်း၊ ပုဂ္ဂလိကဆေးရုံများနှင့် ပူးပေါင်း၍လည်းကောင်း ဆောင်ရွက်လျက်ရှိပါသည်။
၂။ ထိုသို့ဆောင်ရွက်ရာတွင် -
(က) ပြည်ထောင်စုနယ်မြေ နေပြည်တော်၊ ဥတ္တရသီရိမြို့နယ်တွင်နေထိုင်သော အသက် (၃၅) နှစ်အရွယ် အမျိုးသားတစ်ဦးသည် ထိုင်းနိုင်ငံ၊ ဘန်ကောက်မြို့မှ (၃-၃-၂၀၂၀)ရက်နေ့တွင် မြန်မာနိုင်ငံသို့ ပြန်လည်ရောက်ရှိခဲ့ပြီး (၅-၃-၂၀၂၀) ရက်နေ့မှစတင်၍ ဖျားခြင်း၊ နှာစေးခြင်း၊ ချောင်းဆိုးခြင်း လက္ခဏာများခံစားနေရကြောင်း ကျေးလက်ကျန်းမာရေးဌာနခွဲမှ သတင်းပေးပို့ခဲ့သဖြင့် ၎င်းနေ့တွင်ပင် နေပြည်တော်၊ ခုတင် (၁,၀၀၀) ဆံ့ပြည်သူ့ဆေးရုံ ကြီးသို့ ညွှန်းပို့ခဲ့ပါသည်။ ၎င်းအား စောင့်ကြည့်လူနာအဖြစ်သတ်မှတ်၍ သီးခြားထား ရှိကုသမှုပေးလျက်ရှိပြီး ဓါတ်ခွဲနမူနာရယူ၍ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်)သို့ ပေးပို့စစ်ဆေးရန် စီစဉ်ဆောင်ရွက်လျက်ရှိပါသည်။
(ခ) ချင်းပြည်နယ်၊ ဟားခါးမြို့နယ်တွင် နေထိုင်သော အသက် (၃၀) နှစ်အရွယ် အမျိုး သမီးတစ်ဦးသည် မလေးရှားနိုင်ငံ၊ ကွာလာလမ်ပူမြို့မှ ရန်ကုန်အပြည်ပြည်ဆိုင်ရာ လေဆိပ်သို့ (၆-၃-၂၀၂၀) ရက်နေ့၊ နံနက် (၁၀:၁၅) နာရီအချိန်တွင် ရောက်ရှိလာခဲ့ပြီး လေဆိပ်ကျန်းမာရေးဌာနတွင် တာဝန်ကျကျန်းမာရေးဝန်ထမ်းများမှ ရောဂါစောင့်ကြပ်ကြည့်ရှုခြင်းလုပ်ငန်းများ ဆောင်ရွက်ခဲ့ရာ ကိုယ်အပူချိန်မြင့်တက်ခြင်း၊ ချောင်း ဆိုးခြင်း၊ မောပန်းခြင်း၊ စသည့်ရောဂါလက္ခဏာများခံစားခဲ့ရကြောင်း တွေ့ရှိရသဖြင့် ဝေဘာဂီအထူးကုဆေးရုံသို့ ညွှန်းပို့ခဲ့ပါသည်။ ၎င်းအား စောင့်ကြည့်လူနာအဖြစ် သတ်မှတ်၍ သီးခြားထားရှိ ကုသမှုပေးလျက်ရှိပြီး ဓါတ်ခွဲနမူနာရယူ၍ အမျိုးသား ကျန်းမာရေးဓာတ်ခွဲမှုဆိုင်ရာဌာန (ရန်ကုန်) သို့ ပေးပို့စစ်ဆေးရန် စီစဉ်ဆောင်ရွက်လျက်ရှိပါသည်။ ၎င်း၌ လတ်တလောပြင်းထန်အသက်ရှူလမ်းကြောင်းဆိုင်ရာ ရောဂါလက္ခဏာများ မတွေ့ရှိရပါ။
(ဂ) ရန်ကုန်တိုင်းဒေသကြီး၊ မှော်ဘီမြို့နယ်တွင်နေထိုင်သော အသက် (၁၄) နှစ်အရွယ် အမျိုးသား (၁) ဦးသည် ဖျားခြင်း၊ ချောင်းဆိုးခြင်း၊ မောပန်းခြင်း ရောဂါလက္ခဏာများဖြင့် (၄-၃-၂၀၂၀) ရက်နေ့တွင် အင်းစိန်အထွေထွေရောဂါကုဆေးရုံကြီးသို့ လာရောက်ပြသခဲ့ရာ လူနာမှာ COVID-19 ရောဂါကူးစက်ဖြစ်ပွားလျက်ရှိသော နိုင်ငံများသို့ ခရီးသွားရာဇဝင်နှင့် သံသယလူနာများနှင့် ထိတွေ့ခဲ့သည့် ရာဇဝင်မရှိသော်လည်း လတ်တလောပြင်းထန်အသက်ရှူလမ်းကြောင်းဆိုင်ရာလက္ခဏာများ တွေ့ရှိရသဖြင့် စောင့်ကြည့်လူနာအဖြစ်သတ်မှတ်၍ သီးခြားထားရှိ ကုသမှုပေးလျက်ရှိပြီး ဓါတ်ခွဲ နမူနာရယူ၍ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်)သို့ ပေးပို့စစ်ဆေးရန် စီစဉ်ဆောင်ရွက်လျက်ရှိပါသည်။
(ဃ) ရှမ်းပြည်နယ် (တောင်ပိုင်း)၊ ရပ်စောက်မြို့နယ်တွင် နေထိုင်သော အသက် (၃၄) နှစ်အရွယ် အမျိုးသားတစ်ဦးသည် (၂၃-၂-၂၀၂၀) ရက်နေ့မှစ၍ ဖျားခြင်း၊ မောပန်းခြင်း၊ ချောင်းဆိုးသွေးပါခြင်း စသည့်ရောဂါလက္ခဏာများခံစားခဲ့ရသဖြင့် ပုဂ္ဂလိကဆေးရုံ တစ်ခုတွင် (၂၆-၂-၂၀၂၀) ရက်နေ့မှ (၅-၃-၂၀၂၀) ရက်နေ့အထိ ဆေးကုသမှုပေးခဲ့ပြီး (၆-၃-၂၀၂၀) ရက်နေ့၊ နေ့လည် (၁၂:၀၀) နာရီအချိန်တွင် ရန်ကုန်ပြည်သူ့ဆေးရုံကြီးသို့ ညွှန်းပို့ခဲ့ပါသည်။ လူနာတွင် COVID-19 ရောဂါကူးစက်ဖြစ်ပွားနေသော နိုင်ငံများသို့ ခရီးသွားရာဇဝင်မရှိသော်လည်း လတ်တလောအသက်ရှူလမ်းကြောင်းဆိုင်ရာရောဂါ လက္ခဏာများတွေ့ရှိရသဖြင့် စောင့်ကြည့်လူနာအဖြစ်သတ်မှတ်၍ သီးခြားထားရှိ ကုသမှုပေးလျက်ရှိပြီး ၎င်းထံမှ ဓါတ်ခွဲနမူနာရယူ၍ အမျိုးသားကျန်းမာရေးဓာတ်ခွဲမှု ဆိုင်ရာဌာန(ရန်ကုန်) သို့ ပေးပို့စစ်ဆေးထားရှိပါသည်။ လူနာအား အထူးကြပ်မတ် ကုသမှုများ ပေးခဲ့သော်လည်း အခြေအနေပိုမိုဆိုးရွားလာပြီး (၆-၃-၂၀၂၀) ရက်နေ့၊ ညနေ (၄း၃၀) နာရီအချိန်တွင် သေဆုံးသွားခဲ့ပါသည်။
၃။ ရခိုင်ပြည်နယ်၊ စစ်တွေမြို့နယ်တွင် နေထိုင်သော အသက် (၄၀)နှစ်အရွယ် အမျိုးသားတစ်ဦး သည်(၅-၃-၂၀၂၀)ရက်နေ့တွင် တရုတ်ပြည်သူ့သမ္မတနိုင်ငံ၊ ရွှေလီမြို့မှ မန္တလေးမြို့သို့ သွားစဉ် လားရှိုးမြို့သို့ အရောက်တွင် အသက်ရှူကြပ်၍ မောလာ သဖြင့် (၅-၃-၂၀၂၀) ရက်နေ့၊ ည (၈:၄၀) နာရီအချိန်တွင် လားရှိုးပြည်သူ့ဆေးရုံကြီးသို့ ပို့ဆောင်ပေးခဲ့ပါသည်။ လူနာအား ရောဂါရာဇဝင် စစ်ဆေးမေးမြန်းချက်အရ လူနာသည် လွန်ခဲ့သော (၅) လခန့်မှစ၍ ဆီးချိုရောဂါခံစားနေရပြီး ဖျားခြင်း၊ ချောင်းဆိုးခြင်း စသည့်လက္ခဏာများအား လွန်ခဲ့သော ရက်ပေါင်း (၄၀) ခန့်ကစတင်၍ ခံစားနေခဲ့ရကြောင်း သိရှိရပါသည်။ ၎င်းအား သံသယလူနာအဖြစ်သတ်မှတ်၍ လားရှိုးပြည်သူ့ဆေးရုံကြီးတွင် သီးခြားထားရှိ၍ဆေးကုသမှုများပေးရန် စီစဉ်ဆောင်ရွက်ပြီး အဆိုပါ လူနာထံမှ ဓာတ်ခွဲနမူနာရယူ၍ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) သို့ ပေးပို့ စစ်ဆေးခဲ့ပါသည်။ သို့ရာတွင် လူနာသည် ရောဂါအခြေအနေပိုမိုဆိုးရွားလာပြီး (၅-၃-၂၀၂၀) ရက်နေ့၊ ည (၉:၄၀) နာရီအချိန်တွင် နှလုံးကြီးခြင်း၊ နှလုံးကောင်းစွာအလုပ်မလုပ်ခြင်း၊ သေချာစွာကုသမှုမရရှိထားသော ဆီးချိုရောဂါနှင့် အဆုတ်ရောင်ခြင်းတို့ကြောင့် သေဆုံးသွားခဲ့ပါသည်။
၄။ (၄-၃-၂၀၂၀) ရက်နေ့မှစ၍ စောင့်ကြည့်လူနာအဖြစ် မန္တလေးမြို့၊ ကန်တော်နဒီဆေးရုံကြီး တွင် အထူးကြပ်မတ်ကုသမှုများပေးလျက်ရှိသော မန္တလေးတိုင်းဒေသကြီး၊ မဟာအောင်မြေမြို့နယ် မှ အသက် (၆၈) နှစ်အရွယ် အမျိုးသမီးသည် ရောဂါအခြေအနေ ပိုမိုဆိုးရွားလာပြီး (၆-၃-၂၀၂၀) ရက်နေ့၊ နံနက် (၇:၄၀) နာရီအချိန်တွင် သေဆုံးသွားခဲ့ပါသည်။ အဆိုပါအမျိုးသမီးတွင် နာတာရှည် နှလုံးရောဂါနှင့် ဆီးချိုရောဂါများရှိကြောင်းနှင့် ကနဦးသုံးသပ်ချက်အရ သေဆုံးရသော အကြောင်းအရင်းမှာ ပြင်းထန်အဆုတ်ရောင်ရောဂါနှင့် သေချာစွာမကုသထားသော နှလုံးရောဂါနှင့် ဆီးချိုရောဂါများ၏ နောက်ဆက်တွဲဆိုးကျိုးများကြောင့်ဖြစ်ကြောင်း သုံးသပ်ပြီး ၎င်း၏ ဓာတ်ခွဲအဖြေအား အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) မှရရှိပါက အချိန်နှင့် တစ်ပြေးညီ သတင်းထုတ်ပြန်သွားမည်ဖြစ်ပါသည်။
၅။ ယနေ့ (၆-၃-၂၀၂၀) ရက်နေ့၊ ညနေ (၆:၀၀) နာရီအချိန်အထိ လူနာ (၅) ဦးအား သက်ဆိုင်ရာ ဆေးရုံများတွင် စောင့်ကြပ်ကြည့်ရှုကုသမှုပေးလျက်ရှိပါသည်။
၆။ သတင်းများထပ်မံရရှိပါက အချိန်နှင့်တစ်ပြေးညီ ထုတ်ပြန်သွားမည်ဖြစ်ပါသည်။
Author: MOHS-Admin
Last modified on Friday, 06 Mar 2020